Azad edilmiş ərazilərdə DOST Mərkəzləri yaradılacaq – Sahil Babayev açıqladı
-
- elseo
- 375 views
- 0 comments
İşğaldan azad edilmiş ərazilərimizdə DOST xidmətləri şəbəkəsinin qurulmasına dair “Qarabağ və Şərqi Zəngəzur” DOST proqramı Şuşa şəhərində təqdim olunub.
DOST Agentliyinin Müşahidə Şurasının Şuşada keçirilən iclası şəhidlərimizin xatirəsinin bir dəqiqəlik sükutla yad edilməsi ilə başlayıb.
Şuranın sədri, əmək və əhalinin sosial müdafiəsi naziri Sahil Babayev Prezident, Müzəffər Ali Baş Komandan İlham Əliyevin rəhbərliyi ilə Ordumuzun 2020-ci ildə Vətən müharibəsindəki möhtəşəm tarixi Zəfərindən bəhs edib.
Ərazilərimizin, o cümlədən doğma Şuşamızın Ermənistanın 30 il davam etmiş işğalından azad edildiyini bildirən S.Babayev DOST konsepsiyasının Qarabağ və Şərqi Zəngəzur iqtisadi rayonları üzrə də genişlənməsi üçün işlər aparıldığını deyib.
Nazir bildirib ki, işğaldan azad edilmiş Zəngilan rayonunun Ağalı kəndində 27 may 2022-ci il tarixində Prezident İlham Əliyev və birinci xanım Mehriban Əliyevanın iştirakı ilə ölkə üzrə ilk “Smart DOST” xidmət məntəqəsi artıq istifadəyə verilib. “Smart DOST” sistemi ilə vətəndaşlar əmək, məşğulluq, sosial müdafiə sahəsində onlayn formada 100-dən çox xidmətdən şəffaf, rahat, əlçatan şəkildə faydalana biləcək.
DOST Agentliyi dövlət başçısının 9 avqust 2018-ci il tarixli Fərmanı ilə yaradılıb. Birinci vitse-prezident Mehriban xanım Əliyevanın təşəbbüsü olan DOST konsepsiyası dövlət sosial xidmətlərinin – 154 xidmətin “bir pəncərə”dən, modern, çevik və tam şəffaf mexanizmlər üzərində, vətəndaş məmnunluğuna uyğun təqdim edilməsinə imkan verib.